Na lontan, lontan mëm, dan in péï sitan loin té i fo sote la mèr sèt foi pou ariv laba, lavé in bononm - in kass papay san golèt, lo kor éfilé - la té kondané a mor, soidizan akoz li té i fé sorsié.

Pouskidi sorsié, somanké lété in pë vré, mésorman si li té i zoué èk lo sor, plï souvandéfoi lété pou fé lo bien : pa rienk in kou li la guéri domoun lavé poro sï toute lo kor, fanm té tamann zanfan, marmay doidpié té manzé sanm la bou, gramoun lavé polinévrite èk linfanzite é touskisansui...